Gen 2 | NSS | STEP | Tehen torako, Ngindrai imangsani kol pwan pe hu kol yang iyasura melit masih iripo aliy.

Genesis 2

1 Tehen torako, Ngindrai imangsani kol pwan pe hu kol yang iyasura melit masih iripo aliy. 2

Nondriya lang manonoh ara, mbulya Ngindrai kinhipwen topwei. Pwen pe lang sih i ara ingoh iya mbulyan masih.

3 Ngindrai itoholi lang andrtoyoh ara pe ihaiyaniy, paratesah, kinmangsani melit masih ihipwen, pe ingoh iya lang ara.

Ngindrai imangsani piyang Yiten

4 Iye ara titiye para Ngindrai imangsani kol pwan pe hu kol yang isarayah.

TandrohongaYapan Ngindrai imbusi kol pwan pe hu kol yang ara, 5 hu kei, hu malikei, pe hu ndromndriu handra-handra ara hu kanilek ndrita pwan mapu, pe mbulou mapu kindrut pe hamou ndramat para kipo mbulen kiya ndrita pwan ara kinsarayah mapu. 6 Hapeko ndran ara ngara kisuw mbulu pwan pe ngara kingas kisa paingan, pe ndrita pwan masih ara ipep iya ndran. 7 Pwen napwaiYapan Ngindrai iwiri pwan hape, ipisai pe irayah tehe nombuwe ndramat, pe ihili ngohan iya ngara ndrohongun. Pwen pe ileh pe isarayah ndramat.

8 PwenYapan Ngindrai ihisi piyang hambut ngalan Yiten iya pwen te kup, pe ndramat nepo kinmangsani yiy ara, iyki yiy iya impwan aliy. 9 PeYapan Ngindrai iyki hu kei hakou-hakou hulek ndrita pwan. Hu kei ara, ara lahayahu iya, iya maran, pe mbuwahu ara hiyan para kaniyai. Kei hakou ita ndrokolo piyang ara keye taleh, pe kei hakou i ara kei para kapahasani hiyan pe mwomwan.

10 Pe ndran handrang itarah iyau Yiten, ngara kiyki ndran kiya piyang; pe sohopele ndran ara mahaandrang. 11 Ngala ndran handrang ara Pison, irah irakayani kol namandran Hawila mepo kolt ^{▼▼2:11Eng:gold; TP:gol} italiy. 12 Kolt para kol Hawilah ara hiyan iya, pe kei hakou italiy, ngonoho ndreyen ara layin iya. Pe pat handra kenen namandran italiy yi, ngalan ara kaniliyan ^{▼▼2:12 Eng:onyx/carnelian}. 13 Pe ndran lundrang ngalan ara Kihon, pe irah irakayani kol namandran Kus. 14 Pe ndran tindrang ngalan ara Taikris; pe irah irakayani ngilse kol namandran Assiriya iya pwen te kup. Pe ndran haandrang ngalan ara Yuparates.

15 PwenYapan Ngindrai iwiri ndramat nepo imangsani yiy ara, pe iyki yiy iya pe iro nondriya nalpiyang Yiten, para kiro nimnim pe kipo mbulen kiyaliy.

16 Pwen peYapan Ngindrai iyki nongnan pwokeyan iya kili ndramat ara toro: “Wou ara, aya hiyan para aroyan mbuwakei masikene iripo nalpiyang; 17 hapeko kei hakou o —- kei para kapahasani hiyan pe mwomwan —- ara mbunayan mbuwan. Kapa ayan, andre amat lang ara ko.”

18 Pwen peYapan Ngindrai ipwai ipa, “Kinna hiyan para ndramat ara andre kinto ko mwaihei; pwi yoh. Yo andre kumangsani hamou para kisopwat yiy.”

19 PeYapan Ngindrai imangsani pwan isarayah hu kan namandran para yangiy, pe hu norukan horawoh yang, iyapolo hu kan masikene. Pe iyki hu kan makunuwehu ara iya kili Atam para kiyoh ngala hu. Pwen iyoh ngalahu tehen tora, pe mahapo hu masih mangalahu ko. 20 Tehen torako iyoh topwe ngalahu norukan masih para wohowoh, pe hu kan para wum pe hu kan para yangiy.

Hapeko mwelenga hu kan pe norukan masikene ara, andre hamou tahu kinlahiy para kisopwat Atam ^{▼▼2:20 Ngalan “Atam” iya nongna kolo hu Hipuru ara ipa “ndramat”; Eng: In the Hebrew language, the name “Adam” means “man” or “mankind”; TP: Long tok Hibru, nem “Adam” i wankain olsem dispela tok “manmeri”} pwi.

21 Pwen peYapan Ngindrai imbusi ndramat iye pwan pe imatin turut. Iro matin turut ndron, pe Ngindrai iwiri ndruwin hakou para mbulsulkomwan pe irapairani kapilon imui iya nokun. 22 PwenYapan Ngindrai iwiri ndruwi mbulsulkomwa ndramat ara pe imangsani isarayah pihin. Pwen iwiri pihin iya kili Atam.

23 Pwen Atam ipwai ipa,

“Yiy ara ndruwin iro ndruwi,
pe sangin ara iro sangi.
Pe ngalan ara ‘pihin,’
paratesah, yiy isarayah ipwen te kili kamai.”
24 Tehen torako kapa kamai kitali taman pe tinan pe kipo hamou pihin kiya nambuyun, pwen andre hilu kasarayah hamou opu.

25 Atam pe nambuyun ara mwaye hilu pwi, hapeko hilu kanmasi ta hilu pwi.